جنگ بندی کے باوجود غزہ پر اسرائیلی حملے، 4 فلسطینی شہید، 22 زخمی

غزہ( مانیٹرنگ ڈیسک) جنگ بندی کے باوجود پیر کی صبح سے اسرائیلی حملوں میں کم از کم 4 فلسطینی شہید جبکہ 22 افراد زخمی ہوگئے۔مقامی طبی ذرائع کے مطابق اسرائیلی حملے مختلف علاقوں میں گاڑیوں اور ایک رہائشی گھر کو نشانہ بنا کر کیے گئے۔رپورٹس کے مطابق خان یونس کے جنوبی علاقے میں ایک گاڑی پر حملے کے نتیجے میں 2 فلسطینی شہید اور 16 دیگر زخمی ہوئے۔عینی شاہدین کا کہنا ہے کہ خان یونس کے شمال میں المطاحین جنکشن کے قریب بھی ایک گاڑی کو نشانہ بنایا گیا، تاہم اس حملے میں کسی جانی نقصان کی اطلاع نہیں ملی۔دوسری جانب غزہ شہر کے جنوبی علاقے تل الہوا میں ایک رہائشی گھر پر اسرائیلی حملے کے نتیجے میں ایک فلسطینی مرد اور ان کی اہلیہ شہید ہوگئے، جبکہ 6 افراد زخمی ہوئے۔حملے کے بعد گھر میں آگ بھڑک اٹھی، جسے شہری دفاع کی ٹیموں اور مقامی رہائشیوں نے مشترکہ کوششوں سے بجھایا۔