کوئٹہ( پاکستان خبر) بلوچستان میں آپریشن ردالفتنہ 3 کے تحت سکیورٹی فورسز کی کارروائیاں جاری ہیں، زیارت، ہرنائی اور سوراب میں انٹیلی جنس بیسڈ آپریشنز کے دوران مزید 9 دہشتگرد ہلاک کردیے گئے۔سکیورٹی ذرائع کے مطابق زیارت اور ہرنائی کے درمیان پہاڑی علاقے میں خفیہ اطلاع پر کیے گئے آپریشن میں فورسز نے دہشتگردوں کے ٹھکانے کو گھیرے میں لے کر مؤثر کارروائی کی، جس کے نتیجے میں 8 دہشتگرد مارے گئے جبکہ ان کا ٹھکانہ بھی تباہ کردیا گیا۔دوسری کارروائی ضلع سوراب کے علاقے حاجیکہ گاؤں میں کی گئی، جہاں ایک دہشتگرد ہلاک ہوا۔ فورسز نے دشت کٹائی اور حاجیکہ کے درمیان ناکہ بندی کرکے دہشتگردوں کی نقل و حرکت کا سراغ لگایا۔کارروائی کے دوران ہلاک دہشتگردوں کے قبضے سے ایمونیشن، میگزین، دستی بم، واکی ٹاکی، موٹرسائیکل اور دیگر سامان بھی برآمد کیا گیا۔وفاقی وزیر داخلہ محسن نقوی نے بلوچستان میں 9 سے زائد دہشتگردوں کو ہلاک کرنے پر سکیورٹی فورسز کی پیشہ ورانہ صلاحیتوں کو سراہتے ہوئے کہا کہ دہشتگردوں کے مذموم عزائم ناکام بنانے والے جوان قوم کا فخر ہیں۔محسن نقوی نے کہا کہ دہشتگردی کے خلاف جنگ میں قوم سکیورٹی فورسز کے ساتھ کھڑی ہے، جبکہ فتنہ الہندوستان اور فتنہ الخوارج کے خلاف کارروائیاں پوری قوت سے جاری رہیں گی۔
