کابل( مانیٹرنگ ڈیسک) افغانستان میں مزاحمتی گروہ افغانستان یونائیٹڈ فرنٹ نے طالبان حکومت کے خلاف مسلح کارروائیاں شروع کرنے کا اعلان کر دیا ہے۔سابق افغان جنرل اور افغانستان یونائیٹڈ فرنٹ کے سربراہ سمیع سادات نے اپنے ویڈیو بیان میں کہا کہ طالبان کے خلاف کارروائیوں کی اجازت دے دی گئی ہے اور جنگی اقدامات کا پہلا مرحلہ شروع ہو چکا ہے۔جنرل سمیع سادات کے مطابق طالبان کے ارکان، مراکز اور قیادت کو نشانہ بنانے کے لیے کارروائیاں کی جائیں گی۔ انہوں نے افغان فوج کی وردی میں جاری کیے گئے بیان میں کہا کہ ان کا گروہ طالبان کے علاوہ القاعدہ، داعش، تحریک طالبان پاکستان اور دیگر مسلح تنظیموں کے خلاف بھی جدوجہد کرے گا۔انہوں نے کہا کہ طالبان کے اقتدار میں آنے کے بعد تقریباً پانچ سال گزر چکے ہیں اور اب یہ ثابت ہو گیا ہے کہ مذاکرات کے ذریعے مسئلے کے حل کی کوششیں ناکام ہو چکی ہیں۔سمیع سادات نے افغانستان کے اندر اور بیرون ملک مقیم افغان شہریوں سے اپیل کی کہ وہ متحد ہو کر ملک کو طالبان کے کنٹرول سے آزاد کرانے کی کوششوں کا حصہ بنیں۔
