احسن اقبال نے دس سال میں برآمدات 100 ارب ڈالر تک بڑھانے کا ہدف دے دیا

اسلام آباد (کامرس ڈیسک) وفاقی وزیر منصوبہ بندی احسن اقبال نے کہا ہے کہ پاکستان میں برآمدات 100 ارب ڈالر تک پہنچانے کی صلاحیت موجود ہے، تاہم پائیدار معاشی ترقی کے لیے برآمدات پر مبنی معیشت کو فروغ دینا ہوگا۔ انہوں نے آئندہ دس سال میں ملکی برآمدات 100 ارب ڈالر تک پہنچانے کا ہدف حاصل کرنے پر زور دیا۔وفاقی دارالحکومت میں ایک تقریب سے خطاب کرتے ہوئے احسن اقبال نے کہا کہ اس ہدف کے حصول کے لیے جامع منصوبہ بندی، مؤثر پالیسیوں اور مختلف شعبوں کے درمیان بہتر رابطے کی ضرورت ہے۔انہوں نے کہا کہ سیاسی عدم استحکام اور پالیسیوں میں تبدیلیوں نے ملک کی معاشی منصوبہ بندی کو متاثر کیا ہے۔ معاشی ترقی کے لیے پالیسیوں میں تسلسل برقرار رکھنا اور سیاسی استحکام یقینی بنانا ضروری ہے۔وفاقی وزیر کا کہنا تھا کہ برآمدات بڑھانے کے لیے مربوط ٹرانسپورٹ اور لاجسٹکس نظام ناگزیر ہے۔ سڑکوں، ریلوے، بندرگاہوں اور فضائی شعبے کے درمیان مؤثر رابطے کے بغیر برآمدات میں مطلوبہ اضافہ حاصل کرنا مشکل ہوگا۔احسن اقبال نے کہا کہ لاجسٹکس کے نظام میں تاخیر سے برآمدات کی لاگت بڑھ جاتی ہے، جس سے عالمی منڈیوں میں پاکستانی مصنوعات کی مسابقت متاثر ہوتی ہے۔ نقل و حمل اور سامان کی ترسیل کے نظام کو بہتر بنا کر پاکستانی مصنوعات کم وقت اور کم لاگت میں عالمی منڈیوں تک پہنچائی جاسکتی ہیں۔انہوں نے زور دیا کہ برآمدات میں اضافے، پالیسیوں کے تسلسل اور سیاسی استحکام کے ذریعے پاکستان اپنی معاشی صلاحیت سے بھرپور فائدہ اٹھا سکتا ہے۔