لندن( ویب ڈیسک)ایک نئی رپورٹ کے مطابق برطانیہ کی وہ کمپنیاں جو مصنوعی ذہانت اپنا رہی ہیں، وہ کارکردگی میں بہتری، اخراجات میں کمی اور آمدنی میں اضافے جیسے واضح فوائد حاصل کر رہی ہیں۔ اس کے برعکس پرانے اور لندن سے باہر قائم کاروباری اداروں کے اس مقابلے میں پیچھے رہ جانے کا خدشہ بڑھ گیا ہے۔رپورٹ میں بتایا گیا ہے کہ کاروباری سافٹ ویئر استعمال کرنے والے لاکھوں اداروں کے خفیہ انتظامی ڈیٹا اور مختلف ممالک کے ہزاروں کاروباروں پر کیے گئے سرویز کا تجزیہ کیا گیا۔نتائج کے مطابق برطانیہ کی تقریباً ستر فیصد کمپنیاں اب کسی نہ کسی سطح پر مصنوعی ذہانت استعمال کر رہی ہیں۔رپورٹ میں یہ بھی سامنے آیا کہ ستتر فیصد کاروباروں نے کہا کہ مصنوعی ذہانت کے استعمال سے ان کی پیداواری صلاحیت میں اضافہ ہوا ہے، جبکہ بیالیس فیصد نے آمدنی میں اضافے کی تصدیق کی۔مزید برآں ستائیس فیصد کاروباروں نے بتایا کہ اس ٹیکنالوجی کے باعث ان کے کام کے اوقات میں کمی آئی، جبکہ اٹھائیس فیصد اداروں نے اخراجات میں کمی کا بھی ذکر کیا۔
