وا شنگٹن( مانیٹرنگ ڈیسر)مشرق وسطیٰ میں کشیدگی کے باعث فضائی سفر بری طرح متاثر ہوا ہے، جہاں کئی بین الاقوامی ایئرلائنز نے سیکیورٹی خدشات کے پیش نظر مخصوص فضائی راستوں کا استعمال ترک کر دیا ہے۔ذرائع کے مطابق مختلف پروازیں اب متبادل اور طویل راستے اختیار کرنے پر مجبور ہیں، جس کے نتیجے میں سفر کا وقت بڑھ گیا ہے اور ایندھن کے اخراجات میں بھی اضافہ دیکھنے میں آ رہا ہے۔ایوی ایشن حکام کا کہنا ہے کہ پاکستانی پروازوں کے روٹس میں بھی تبدیلی کی گئی ہے اور اب یہ مخصوص فضائی حدود سے گزرنے کے بجائے دیگر محفوظ راستے استعمال کر رہی ہیں۔ان نئے راستوں کے باعث خلیجی شہروں سے پاکستان آنے والی پروازوں کے دورانیے میں نمایاں اضافہ ریکارڈ کیا گیا ہے، جہاں بعض پروازوں کا وقت ڈیڑھ گھنٹے سے زائد بڑھ گیا ہے۔ماہرین کے مطابق خطے میں جاری کشیدگی کے اثرات نہ صرف فضائی سفر بلکہ عالمی معیشت پر بھی مرتب ہو رہے ہیں، جبکہ صورتحال معمول پر آنے تک یہ مشکلات برقرار رہنے کا امکان ہے۔
