آزاد کشمیر الیکشن کمیشن کا نیا انتخابی شیڈول جاری، پولنگ 27 جولائی کو ہوگی

 اسلام آباد(پاکستان خبر)آزاد جموں و کشمیر الیکشن کمیشن نے آئندہ انتخابات کے لیے نیا انتخابی شیڈول جاری کر دیا ہے، جس کے مطابق پولنگ 27 جولائی کو ہوگی۔اعلامیے کے مطابق کاغذات نامزدگی جمع کرانے کی آخری تاریخ 23 جون مقرر کی گئی ہے، جبکہ ان کی جانچ پڑتال 24 جون کو صبح 8 بجے سے شروع ہوگی۔ اسی روز درست امیدواروں کی ابتدائی فہرست بھی جاری کی جائے گی۔شیڈول کے مطابق ریٹرننگ افسران کے فیصلوں کے خلاف اپیلیں 25 سے 28 جون تک دائر کی جا سکیں گی، جبکہ ان اپیلوں کی سماعت 29 اور 30 جون کو ہوگی۔ اپیلوں پر فیصلے یکم اور 2 جولائی کو سنائے جائیں گے۔نوٹیفکیشن کے مطابق کاغذات نامزدگی واپس لینے کی آخری تاریخ 3 جولائی دوپہر 2 بجے مقرر کی گئی ہے، جبکہ امیدواروں کی حتمی فہرست 4 جولائی کو جاری کی جائے گی۔انتخابی نشانات 5 جولائی کو الاٹ کیے جائیں گے اور اسی روز حتمی امیدواروں کی فہرست بھی شائع کی جائے گی۔الیکشن کمیشن کے مطابق پونچھ (راولاکوٹ) کے امیدوار اپنے کاغذات نامزدگی متعلقہ ریٹرننگ افسران کے پاس جمع کرائیں گے، اور ان کی جانچ پڑتال بھی وہیں کی جائے گی۔کمیشن نے کہا ہے کہ شیڈول میں تبدیلی امیدواروں کی درخواستوں اور عوامی سہولت کو مدنظر رکھتے ہوئے کی گئی ہے، اور تمام امیدواروں کو مقررہ وقت کے اندر کاغذات جمع کرانے کی ہدایت کی گئی ہے۔