راولپنڈی( پاکستان خبر)آزاد جموں و کشمیر قانون ساز اسمبلی کے دوسرے مرحلے کے انتخابات کے لیے پولنگ کل 2 اگست کو مظفرآباد ڈویژن میں ہوگی، جبکہ مہاجرین کی 12 نشستوں پر بھی ووٹ ڈالے جائیں گے۔انتخابات کے دوسرے مرحلے کے لیے پولنگ عملے کو انتخابی سامان کی فراہمی کا عمل شروع کر دیا گیا ہے۔ راولپنڈی میں سکستھ روڈ پر قائم گورنمنٹ گریجویٹ کالج کے ڈسٹری بیوشن پوائنٹ سے عملہ بیلٹ پیپرز، بیلٹ باکسز اور دیگر حساس انتخابی مواد وصول کر رہا ہے۔ذرائع کے مطابق انتخابی عملے کو بیلٹ پیپرز اور سرکاری ریکارڈ فراہم کیا جا رہا ہے، جس کے بعد اہلکار اپنے متعلقہ پولنگ اسٹیشنز روانہ ہو رہے ہیں۔ انتخابی سامان کی ترسیل پولیس کی سخت سیکیورٹی میں جاری ہے تاکہ کسی بھی ناخوشگوار صورتحال سے بچا جا سکے۔ضلعی انتظامیہ اور الیکشن حکام پولنگ انتظامات کو حتمی شکل دینے میں مصروف ہیں، جبکہ تمام پولنگ اسٹیشنز پر ضروری انتظامات مکمل کر لیے گئے ہیں اور عملہ تعیناتی کے لیے تیار ہے۔حکام کے مطابق مقررہ وقت پر پولنگ کا آغاز ہوگا، جبکہ سامان کی تقسیم مکمل ہونے کے بعد پولنگ عملہ اپنی ذمہ داریاں سنبھال لے گا۔آزاد کشمیر مہاجرین کی نشستوں کے لیے راولپنڈی میں جموں 6، وادی 4 اور وادی 5 کے حلقوں میں پولنگ ہوگی۔ وادی 4 کا حلقہ صرف راولپنڈی شہر تک محدود ہے، وادی 5 میں راولپنڈی اور اسلام آباد کے علاقے شامل ہیں، جبکہ جموں 6 کا حلقہ راولپنڈی ڈویژن سے اسلام آباد تک پھیلا ہوا ہے۔
