تل ابیب( مانیٹرنگ ڈیسک)اسرائیل میں بحیرۂ روم کے ساحلی پانی میں خردبینی کائی کے غیر معمولی پھیلاؤ نے سمندری پانی صاف کرنے والے پلانٹس کے نظام کو متاثر کردیا ہے۔پانی میں کائی اور دیگر ذرات کی مقدار بڑھنے سے سمندری پانی کی صفائی اور فلٹریشن کا عمل متاثر ہوا، جس کے باعث اسرائیل کے 6 بڑے سمندری پانی صاف کرنے والے پلانٹس میں سے ابتدائی طور پر 5 کو بند یا محدود کرنا پڑا۔6 ستمبر تک اشکلون اور اشدود کے دو پلانٹس مکمل طور پر بند تھے، جبکہ مزید تین پلانٹس جزوی استعداد کے ساتھ کام کررہے تھے۔ حیدرا کا پلانٹ معمول کے مطابق فعال رہا۔حکام نے بعض علاقوں میں پانی کے دباؤ میں کمی اور عارضی قلت کا خدشہ ظاہر کرتے ہوئے شہریوں سے پانی کے استعمال میں کمی کی اپیل کی ہے۔اسرائیلی محققین کے مطابق موجودہ صورتحال کا ممکنہ سبب بحیرۂ روم میں کائی کا بڑے پیمانے پر پھیلاؤ ہے۔ ماہرین کا کہنا ہے کہ اس طرح کی کائی فلٹریشن نظام اور ریورس اوسموسس جھلیوں کو متاثر کرسکتی ہے، جس سے پانی کی پیداوار کم ہونے کے ساتھ پلانٹس کو عارضی طور پر بند بھی کرنا پڑسکتا ہے۔
