الجزائر( مانیٹرنگ ڈیسک)الجزائر کے شمالی صوبے بومرداس میں پیش آنے والے ایک المناک بس حادثے کے نتیجے میں کم از کم 25 افراد جاں بحق جبکہ 44 زخمی ہو گئے۔حکام کے مطابق حادثہ اس وقت پیش آیا جب مسافر بس شاہراہ پر سفر کے دوران بے قابو ہو کر سڑک سے نیچے جا گری اور الٹ گئی۔ابتدائی اطلاعات کے مطابق بس سیطیف سے دارالحکومت الجزائر جا رہی تھی۔ حادثے کے فوراً بعد سول ڈیفنس، پولیس اور طبی امدادی ٹیمیں موقع پر پہنچ گئیں اور امدادی کارروائیاں شروع کر دیں۔زخمیوں کو فوری طور پر قریبی اسپتالوں منتقل کیا گیا، جن میں بعض کی حالت تشویشناک بتائی جا رہی ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔حکام نے جاں بحق افراد کی شناخت کا عمل شروع کر دیا ہے جبکہ ان کے اہل خانہ کو اطلاع دی جا رہی ہے۔الجزائری حکومت نے حادثے کی تحقیقات کا حکم دے دیا ہے۔ اگرچہ حادثے کی حتمی وجہ سامنے نہیں آ سکی، تاہم ابتدائی طور پر تیز رفتاری، ڈرائیور کے گاڑی پر قابو کھونے یا سڑک کی خراب صورتحال کو ممکنہ وجوہات قرار دیا جا رہا ہے۔حکام کے مطابق تیز رفتاری، ٹریفک قوانین کی خلاف ورزی، گاڑیوں کی خراب حالت اور بعض شاہراہوں پر حفاظتی انتظامات کی کمی ہر سال بڑی تعداد میں حادثات کا سبب بنتی ہے۔واقعے کی مکمل تحقیقات جاری ہیں، جبکہ زخمیوں کو بہتر طبی سہولیات فراہم کرنے اور متاثرہ خاندانوں کی مدد کے لیے ہنگامی اقدامات کیے جا رہے ہیں۔
