اسلام آباد (پاکستان خبر) وزیر دفاع خواجہ آصف نے کہا ہے کہ آزاد کشمیر میں ریاست مخالف ایجنڈا کے خلاف پوری قوت کے ساتھ قانون نافذ کیا جائے گا۔سماجی رابطے کی ویب سائٹ پر اپنے بیان میں انہوں نے کہا کہ انتخابات قریب ہیں اور اختلافی مسائل کو عوام کے فیصلے کے لیے پیش کرنا جمہوری عمل کا حصہ ہے۔وزیر دفاع کے مطابق جو عناصر عوامی رائے کے بجائے تشدد کے ذریعے اپنی سوچ مسلط کرنے کی کوشش کر رہے ہیں، ان کے مقاصد جمہوری نہیں۔انہوں نے کہا کہ حالیہ واقعات میں پولیس اور سکیورٹی اہلکاروں کو نشانہ بنایا گیا، جو انتہائی افسوسناک ہے اور اس سے ظاہر ہوتا ہے کہ یہ عناصر انتخابی عمل کو سبوتاژ کرنا چاہتے ہیں۔خواجہ آصف نے واضح کیا کہ ریاست کسی بھی غیر قانونی یا ریاست مخالف سرگرمی کو برداشت نہیں کرے گی اور قانون کی مکمل عملداری کو یقینی بنایا جائے گا، جبکہ عوام کو اپنی رائے کے آزادانہ اظہار کا موقع دیا جائے گا۔
