انسداد دہشت گردی عدالت نے پی ٹی آئی رہنماؤں کی گرفتاری 21 مئی تک موخر کر دی

اسلام آباد( پاکستان خبر) انسداد دہشت گردی عدالت اسلام آباد نے پی ٹی آئی رہنماؤں کو 21 مئی تک گرفتار نہ کرنے کا حکم دے دیا ہے۔اے ٹی سی کے جج ابوالحسنات محمد ذوالقرنین نے پی ٹی آئی رہنماؤں کے خلاف 26 نومبر، سنگجانی جلسہ اور سپریم کورٹ کے باہر احتجاج سمیت دیگر مقدمات کی سماعت کی۔سماعت کے دوران پی ٹی آئی رہنما عمیر نیازی، رؤف حسن اور اعظم سواتی سمیت دیگر رہنما عدالت میں پیش ہوئے۔عدالت نے پی ٹی آئی رہنماؤں کی 230 سے زائد ضمانت کی درخواستوں میں توسیع کرتے ہوئے انہیں 21 مئی تک گرفتار نہ کرنے کی ہدایت دی۔ عدالت نے فریقین کو اگلی سماعت پر کیسز میں حتمی دلائل دینے کا بھی کہا۔واضح رہے کہ ان رہنماؤں کے خلاف تھانہ ترنول، رمنا، آبپارہ، سیکرٹریٹ اور دیگر تھانوں میں متعدد مقدمات درج ہیں، جن کی سماعت جاری ہے اور سیاسی حلقوں کی توجہ کا مرکز بنی ہوئی ہے۔