اسلام آباد ( ویب ڈیسک) ٹیکنالوجی کمپنی ایپل نے اپنی موسیقی سننے کی آن لائن سروس ایپل میوزک کی دستیابی پاکستان سمیت مزید چار ممالک تک بڑھا دی ہے، جس کے بعد یہ سہولت دنیا کے 172 ممالک اور خطوں میں دستیاب ہوگئی ہے۔ایپل نے اپنی معاونتی ویب سائٹ پر سروس کی دستیابی سے متعلق فہرست میں پاکستان، البانیہ، برونائی اور برکینا فاسو کو بھی شامل کرلیا ہے۔ان چار ممالک میں پاکستان، البانیہ اور برکینا فاسو ایسے ممالک بھی ہیں جہاں ایپل نے حال ہی میں آئی کلاؤڈ پلس کے بعض منصوبوں میں ایپل ٹی وی اور ایپل آرکیڈ کی سہولت اضافی قیمت کے بغیر فراہم کرنے کا اعلان کیا تھا۔ برونائی اس فہرست میں شامل نہیں ہے، جہاں ایپل ٹی وی کی رکنیتی سروس تاحال دستیاب نہیں۔ایپل میوزک کی عالمی سطح پر توسیع کے ساتھ اینڈرائیڈ صارفین کے لیے ایپ کا نیا آزمائشی نسخہ بھی جاری کردیا گیا ہے۔ایپل میوزک کے نئے ورژن 7.0 میں ’لیکویڈ گلاس‘ طرز کا ڈیزائن، نیا تیرتا ہوا رہنمائی بار اور چھوٹے میوزک پلیئر سمیت متعدد نئی تبدیلیاں شامل کی گئی ہیں۔پاکستان میں سروس کی باضابطہ دستیابی کے بعد مقامی صارفین اب ایپل کی موسیقی سننے کی آن لائن سہولت استعمال کرسکیں گے، جبکہ اینڈرائیڈ صارفین کو بھی نئی شکل اور اضافی خصوصیات میسر ہوں گی۔
