کیلیفورنیا( ویب ڈیسک) ٹیکنالوجی کمپنی ایپل کے نئے فولڈ ہونے والے اسمارٹ فون آئی فون ڈُوو کی رواں برس تقریباً 60 لاکھ یونٹس فروخت متوقع ہے۔مارکیٹ پر تحقیق کرنے والے ادارے کاؤنٹر پوائنٹ ریسرچ کی رپورٹ کے مطابق فون کی قیمت اور صارفین کی جانب سے ممکنہ پذیرائی اس کی طلب پر نمایاں اثر ڈال سکتی ہے۔آئی فون ڈُوو کی قیمت 1999 ڈالر مقرر کی گئی ہے، جو سام سنگ گلیکسی زیڈ فولڈ 8 کے مقابلے میں تقریباً 100 ڈالر زیادہ ہے۔کاؤنٹر پوائنٹ ریسرچ کے تحقیقی ڈائریکٹر ترُن پاٹھک کے مطابق ایپل کی جانب سے قیمت کا تعین نئے فون کی پیشکش کے اہم پہلوؤں میں شامل ہے۔انہوں نے کہا کہ پہلی نسل کے فولڈ ہونے والے فون کی قیمت 2000 ڈالر سے کم رکھنا ایپل کی جانب سے ایک جرات مندانہ اقدام ہے۔ ان کے مطابق اس قیمت پر موجودہ آئی فون پرو استعمال کرنے والوں اور طویل عرصے سے ایپل کے فولڈ ایبل فون کے منتظر صارفین کی جانب سے دلچسپی پیدا ہوسکتی ہے۔تاہم، 60 لاکھ فونز کی فروخت کا اندازہ زیادہ سے زیادہ ممکنہ سطح کو ظاہر کرتا ہے اور اصل فروخت کا انحصار اس بات پر ہوگا کہ ایپل اپنی پیداواری صلاحیت میں کتنی تیزی سے اضافہ کر پاتا ہے۔ایپل کے نئے چیف ایگزیکٹو جان ٹرنَس نے فون کے ڈیزائن کو سوچ سمجھ کر تیار کیا گیا ڈیزائن قرار دیا۔ ان کا کہنا تھا کہ بعض دیگر کمپنیوں کے فولڈ ہونے والے فون ایسے محسوس ہوتے ہیں جیسے دو الگ فونز کو آپس میں ملا دیا گیا ہو۔
