کیلیفورنیا( ویب ڈیسک) ویڈیو شیئرنگ پلیٹ فارم یوٹیوب نے اینڈرائیڈ اور آئی او ایس موبائل ایپس کے لیے متعدد نئی تبدیلیوں کا اعلان کیا ہے، جن کا مقصد ہوم پیج کے تجربے کو بہتر بنانا اور صارفین کے لیے اپنی دلچسپی کے مطابق ویڈیوز تلاش کرنا آسان بنانا ہے۔ٹیکنالوجی ویب سائٹ ’9 ٹو 5 گوگل‘ کی رپورٹ کے مطابق نئی اپ ڈیٹ میں ایپ کی ٹاپ بار کا ڈیزائن تبدیل کرنے کے ساتھ کسٹم فیڈز بنانے کا فیچر بھی شامل کیا گیا ہے۔رپورٹ کے مطابق یوٹیوب سبسکرپشنز کے ٹیب کو اسکرین کے نچلے حصے سے منتقل کرکے اوپری ٹاپ بار میں جگہ دے رہا ہے۔ ہوم بٹن کے ساتھ سبسکرپشنز کا نیا بٹن بھی دکھائی دے گا، جس کے نیچے سرخ لکیر موجود ہوگی۔اس کے علاوہ لائیو میوزک اور موویز اینڈ ٹی وی جیسی نئی فیڈز بھی ٹاپ بار میں شامل کی جا رہی ہیں، تاکہ صارفین اپنی پسند کے مطابق متعلقہ ویڈیوز اور دیگر مواد تک آسانی سے رسائی حاصل کرسکیں۔کسٹم فیڈز بنانے کی سہولتنئی اپ ڈیٹ میں سب سے اہم اضافہ پلس (+) بٹن ہے، جس کے ذریعے صارفین اپنی پسند کے موضوعات پر مبنی کسٹم فیڈز بنا سکیں گے۔ اس فیچر کی مدد سے کسی مخصوص موضوع کا انتخاب کرکے ایسی فیڈ تیار کی جا سکے گی جس میں اسی موضوع سے متعلق ویڈیوز دکھائی جائیں گی۔اس طرح صارفین کو اپنی دلچسپی کا مواد دیکھنے کے لیے بار بار سرچ کرنے کی ضرورت کم پڑے گی اور وہ اپنی پسند کے موضوعات سے متعلق ویڈیوز ایک ہی جگہ دیکھ سکیں گے۔رپورٹ کے مطابق یوٹیوب مفت استعمال کرنے والے صارفین زیادہ سے زیادہ تین فعال کسٹم فیڈز محفوظ کرسکیں گے، جبکہ یوٹیوب پریمیم صارفین کو آٹھ فیڈز محفوظ کرنے کی سہولت فراہم کی جائے گی۔ابتدائی طور پر امریکا میں دستیابیرپورٹ میں بتایا گیا ہے کہ کسٹم فیڈز کا فیچر ابتدائی طور پر امریکا میں صارفین کے لیے متعارف کرایا جا رہا ہے، جبکہ بعد ازاں اسے دیگر ممالک میں بھی پیش کیے جانے کا امکان ہے۔یوٹیوب کی جانب سے ان تبدیلیوں کا مقصد صارفین کو ان کی دلچسپی کے مطابق ویڈیوز تک تیز اور آسان رسائی فراہم کرنا اور موبائل ایپ کے ہوم پیج کو مزید بہتر بنانا ہے۔
