ملک میں مہنگائی کی ہفتہ وار شرح میں 0.65 فیصد اضافہ، سالانہ شرح 11.85 فیصد ہوگئی

اسلام آباد( کامرس ڈیسک) ملک میں مہنگائی کی ہفتہ وار شرح میں 0.65 فیصد اضافہ ریکارڈ کیا گیا ہے، جبکہ سالانہ بنیادوں پر مہنگائی بڑھنے کی شرح 11.85 فیصد تک پہنچ گئی ہے۔وفاقی ادارۂ شماریات نے مہنگائی سے متعلق ہفتہ وار رپورٹ جاری کردی، جس کے مطابق ایک ہفتے کے دوران 19 اشیائے ضروریہ کی قیمتوں میں اضافہ ہوا، 12 اشیاء سستی ہوئیں جبکہ 20 اشیاء کے نرخ مستحکم رہے۔رپورٹ کے مطابق گزشتہ ایک سال کے دوران ایل پی جی کی قیمت میں 107 فیصد، پیاز میں 72.81 فیصد اور بجلی کے چارجز میں 58.59 فیصد اضافہ ریکارڈ کیا گیا۔اسی عرصے میں پیٹرول 44.17 فیصد، ڈیزل 41.56 فیصد، چکن 38.99 فیصد اور آٹا 36.49 فیصد مہنگا ہوا۔دوسری جانب سالانہ بنیادوں پر ٹماٹر کی قیمت میں 71.72 فیصد، آلو میں 40.75 فیصد اور چینی میں 25 فیصد کمی ریکارڈ کی گئی۔ادارۂ شماریات کے ہفتہ وار اعداد و شمار کے مطابق ایک ہفتے کے دوران ایل پی جی کی قیمت میں 22.44 فیصد، چکن میں 12.20 فیصد اور پیاز میں 4.19 فیصد اضافہ ہوا۔تاہم اسی عرصے میں ٹماٹر 21.99 فیصد سستے ہوئے، جبکہ پیٹرول کی قیمت میں 3.63 فیصد کمی ریکارڈ کی گئی۔