پاکستان سرحدوں کی حفاظت کے لیے مکمل تیار ہے، دہشت گردی افغانستان سے آرہی ہے، ترجمان دفتر خارجہ

اسلام آباد (پاکستان خبر)ترجمان دفتر خارجہ سجاد حیدر خان نے کہا ہے کہ پاکستان نے ہمیشہ امن کی بات کی ہے، تاہم ملک اپنی سرحدوں کی حفاظت کے لیے مکمل تیار ہے اور اپنے دفاع کی صلاحیت رکھتا ہے۔اسلام آباد میں نیوز بریفنگ کے دوران ترجمان دفتر خارجہ نے کہا کہ افغانستان سے پاکستان میں دہشت گردی آرہی ہے، جو اس وقت سب سے بڑا مسئلہ ہے۔ گزشتہ ایک سال کے دوران دہشت گردی کے واقعات میں 1,360 پاکستانی جان سے گئے۔سجاد حیدر خان نے کہا کہ تمام مسائل اور جنگوں کا حل سفارت کاری کے ذریعے ممکن ہے اور پاکستان نے کبھی افغانستان کے ساتھ سفارتی رابطوں پر شرمندگی محسوس نہیں کی۔انہوں نے کہا کہ چین، ازبکستان اور دیگر ممالک کو بھی افغانستان میں دہشت گردوں کی موجودگی پر تحفظات ہیں۔ترجمان دفتر خارجہ نے مکہ دفاعی معاہدے کے حوالے سے کہا کہ اس کی توسیع کے لیے ہر ملک کا اپنا طریقہ کار ہے۔ پاکستان اور سعودی عرب اپنا طریقہ کار مکمل کرچکے ہیں، جبکہ ترکیہ اپنی پارلیمنٹ کے ذریعے معاہدے کی توسیع کا عمل آگے بڑھا رہا ہے۔ انہوں نے کہا کہ مکہ دفاعی معاہدے کا جو مسودہ سامنے آیا ہے، پاکستان اس کی توثیق کرتا ہے۔سجاد حیدر خان کا کہنا تھا کہ پاکستان عالمی برادری کا ایک اہم رکن ہے اور امریکا کے ساتھ مذاکرات میں شریک ہے۔انہوں نے مزید بتایا کہ نائب وزیراعظم اور وزیر خارجہ اسحاق ڈار نے مصر اور ایران کے وزرائے خارجہ سے بھی رابطہ کیا ہے۔ اسحاق ڈار آر فور اجلاس میں شرکت کے لیے ترکیہ پہنچ چکے ہیں، جس کے بعد آر فور پلس ای تھری اجلاس بھی منعقد ہوگا۔ ترجمان کے مطابق اس فارمیٹ میں یہ پہلا اجلاس ہوگا۔