اسلام آباد میں مین ہیٹن طرز کا منصوبہ بنانے کا اعلان، سعودی سرمایہ کاروں کو دعوت

اسلام آباد (پاکستان خبر)وفاقی وزیر داخلہ محسن نقوی نے دارالحکومت میں مین ہیٹن طرز کا جدید رہائشی اور تفریحی منصوبہ شروع کرنے کا اعلان کرتے ہوئے سعودی سرمایہ کاروں کو پاکستان میں سرمایہ کاری کی دعوت دے دی۔سعودی ریئل اسٹیٹ ایکسپو سے خطاب کرتے ہوئے محسن نقوی نے کہا کہ پاکستان میں سرمایہ کاری کے عمل کو آسان بنانے کے لیے ون ونڈو آپریشن متعارف کرایا جائے گا، جس کے ذریعے منصوبوں کی منظوری اور دیگر ضروری امور ہفتوں یا مہینوں کے بجائے چند دنوں میں مکمل کرنے کی کوشش کی جائے گی۔وفاقی وزیر نے بتایا کہ اسلام آباد میں مین ہیٹن طرز کا منصوبہ بنانے کا ارادہ ہے، جس میں مرکزی پارک کے گرد رہائشی اور دیگر سہولتیں فراہم کی جائیں گی۔ اس کے علاوہ اسلام آباد کے سفاری پارک کو جدید خطوط پر استوار کرنے کا منصوبہ بھی زیر غور ہے، جس کے تحت جانوروں کی تعداد بڑھانے اور تفریحی سہولتوں میں اضافہ کرنے کی تجویز ہے۔محسن نقوی کا کہنا تھا کہ پاکستان میں تفریحی سرگرمیوں اور رہائشی منصوبوں کے شعبوں میں سرمایہ کاری کے وسیع مواقع موجود ہیں۔ حکومت سرمایہ کاروں کی دلچسپی بڑھانے اور شفافیت یقینی بنانے کے لیے نیلامی کے عمل میں متعلقہ فریقوں کو شامل کرے گی۔انہوں نے امید ظاہر کی کہ سعودی سرمایہ کار پاکستان میں رہائشی اور تفریحی منصوبوں میں سرمایہ کاری کریں گے۔ ان کا کہنا تھا کہ حکومت سرمایہ کاروں کو سہولتیں فراہم کرنے اور منصوبوں کی منظوری کا عمل تیز بنانے کے لیے اقدامات کر رہی ہے۔