23 سال بعد پاکستانی صدر کا جرمنی کا دورہ، آصف زرداری کو گارڈ آف آنر پیش

برلن (پاکستان خبر) صدر مملکت آصف علی زرداری کے اعزاز میں جرمن وزارت دفاع میں استقبالیہ تقریب منعقد کی گئی، جہاں انہیں گارڈ آف آنر پیش کیا گیا اور دونوں ممالک کے قومی ترانے بجائے گئے۔صدر آصف علی زرداری کی جرمن وزارت دفاع آمد پر جرمنی کے صدر فرینک والٹر شٹائن مائر نے ان کا استقبال کیا۔ اس موقع پر صدر مملکت کے اعزاز میں باضابطہ استقبالیہ تقریب کا اہتمام کیا گیا۔صدر آصف علی زرداری جرمن صدر فرینک والٹر شٹائن مائر کی دعوت پر جرمنی کا دورہ کر رہے ہیں۔ یہ دورہ اس لحاظ سے اہمیت کا حامل ہے کہ 23 سال بعد کسی پاکستانی سربراہ مملکت کا جرمنی کا یہ پہلا دورہ ہے۔رواں سال پاکستان اور جرمنی اپنے سفارتی تعلقات کے قیام کی 75ویں سالگرہ بھی منا رہے ہیں۔دورے کے دوران صدر مملکت اعلیٰ سطح کے پاکستانی وفد کے ہمراہ جرمن صدر اور اعلیٰ حکومتی عہدیداروں سے ملاقاتیں کریں گے۔ ان ملاقاتوں میں دوطرفہ تعلقات، علاقائی و عالمی صورت حال اور معاشی و تجارتی تعاون کے فروغ سمیت مختلف امور پر تبادلہ خیال کیا جائے گا۔توقع ہے کہ صدر آصف علی زرداری کا یہ دورہ پاکستان اور جرمنی کے تعلقات کو مزید مستحکم بنانے اور مختلف شعبوں میں باہمی تعاون کے فروغ کے لیے نئی راہیں کھولنے میں معاون ثابت ہوگا۔