نیویارک (ویب ڈیسک) ایک امریکی کمپنی نے ایسے خلائی سٹیشنز تیار کرنے کا منصوبہ پیش کیا ہے جو مصنوعی کششِ ثقل پیدا کر کے خلا میں انسانی صحت کو بہتر رکھ سکیں، تاکہ مریخ اور اس سے آگے طویل خلائی مشنز ممکن بنائے جا سکیں۔اس منصوبے کے مطابق مصنوعی کششِ ثقل والے خلائی سٹیشنز انسانوں کے لیے طویل اور محفوظ خلائی سفر کی نئی راہیں کھول سکتے ہیں، جس سے نظامِ شمسی میں مزید دور تک تحقیق اور ممکنہ انسانی آبادکاری کے امکانات میں اضافہ ہوگا۔ماہرین کا کہنا ہے کہ خلا میں طویل قیام کے دوران خلا بازوں کو صفر کششِ ثقل کے باعث پٹھوں کی کمزوری اور ہڈیوں کی کمزوری جیسے سنگین مسائل کا سامنا کرنا پڑتا ہے۔ان مسائل کے حل کے لیے مصنوعی کششِ ثقل کا تصور پیش کیا گیا ہے، جس میں خلائی سٹیشن کو گھما کر سینٹری فیوگل قوت پیدا کی جاتی ہے، جو خلا بازوں کو زمین جیسا ماحول اور احساس فراہم کرتی ہے۔
