کراچی ( پاکستان خبر) خاتونِ اول آصفہ بھٹو زرداری نے خواتین سفارت کاروں کی خدمات کو خراجِ تحسین پیش کرتے ہوئے کہا ہے کہ خواتین سفارت کاری کے شعبے میں عالمی امن اور تعاون کے فروغ میں اہم کردار ادا کر رہی ہیں۔اپنے پیغام میں انہوں نے کہا کہ پاکستانی خواتین نے سفارت کاری کے میدان میں نمایاں خدمات انجام دی ہیں اور عالمی سطح پر ملک کا مثبت تشخص اجاگر کرنے میں مؤثر کردار ادا کیا ہے۔آصفہ بھٹو زرداری نے کہا کہ بیگم رعنا لیاقت علی خان سے لے کر محترمہ بے نظیر بھٹو تک پاکستانی خواتین نے شاندار مثالیں قائم کی ہیں۔ انہوں نے نوجوان خواتین کو سفارت کاری کے شعبے میں آگے بڑھنے کی ترغیب بھی دی۔انہوں نے مزید کہا کہ خواتین کی کامیابیاں پوری قوم کے لیے باعثِ فخر ہیں اور ان کی خدمات آئندہ نسلوں کے لیے مشعلِ راہ ہیں۔
