واہ( پاکستان خبر) چیف آف ڈیفنس فورسز فیلڈ مارشل سید عاصم منیر نے پاکستان آرڈیننس فیکٹریز واہ کا دورہ کیا، جہاں انہیں دفاعی پیداوار، برآمدی صلاحیت اور ملکی دفاعی صنعت کو مستحکم کرنے کے اقدامات پر بریفنگ دی گئی۔آئی ایس پی آر کے مطابق فیلڈ مارشل عاصم منیر کو پی او ایف واہ میں مختلف نوعیت کے فوجی سازوسامان کی مقامی تیاری اور جدید بنانے کے منصوبوں سے آگاہ کیا گیا۔فیلڈ مارشل نے مقامی طور پر تیار اور ڈیزائن کیے گئے ہتھیاروں اور گولہ بارود کی آزمائشوں کا مشاہدہ بھی کیا۔ انہیں پی او ایف کو ایک جدید کاروباری ادارے میں تبدیل کرنے کے عمل میں پیش رفت سے بھی آگاہ کیا گیا۔ترجمان کے مطابق دو نئے صنعتی کارخانے بھی قائم کیے جارہے ہیں، جہاں رواں سال کے اختتام تک پیداوار شروع ہونے کی توقع ہے۔فیلڈ مارشل عاصم منیر نے دفاعی شعبے میں خود انحصاری، مقامی پیداوار اور جدید ٹیکنالوجی کے فروغ کے عزم کا اعادہ کیا۔
