پشاور( پاکستان خبر)خیبر پختونخوا کے محکمہ داخلہ نے ضلع دیر میں مطلوب 15 دہشت گردوں کی نئی فہرست جاری کرتے ہوئے ان کی گرفتاری میں مدد دینے والی معلومات فراہم کرنے والوں کے لیے نقد انعامات کا اعلان کیا ہے۔اعلامیے کے مطابق مطلوب دہشت گرد خورشید کے سر کی قیمت سب سے زیادہ ایک کروڑ 20 لاکھ روپے مقرر کی گئی ہے، جبکہ شیر امین عرف کاکا کی گرفتاری میں معاونت کرنے والے کے لیے ایک کروڑ روپے انعام رکھا گیا ہے۔محکمہ داخلہ کے مطابق قاری احسان اور شیر عالم کے بارے میں معلومات فراہم کرنے پر 60،60 لاکھ روپے انعام دیا جائے گا، جبکہ سپین شاہ، اعجاز اور دیگر مطلوب افراد کے لیے 50،50 لاکھ روپے انعام مقرر کیا گیا ہے۔اسی طرح کفایت، حضرت حسین اور شریف اللہ کی گرفتاری میں مددگار اطلاع دینے والوں کے لیے 40،40 لاکھ روپے انعام کا اعلان کیا گیا ہے۔محکمہ انسداد دہشت گردی کے حکام کے مطابق مطلوب افراد سے متعلق معلومات فراہم کرنے والوں کی شناخت مکمل طور پر خفیہ رکھی جائے گی۔
