کابل( مانیٹرنگ ڈیسک) سابق افغان رکن پارلیمنٹ بکتاش سیاوش نے طالبان حکومت کے مستقبل پر سوالات اٹھاتے ہوئے اس کے جلد خاتمے کی پیشگوئی کر دی۔افغانستان انٹرنیشنل کو دیے گئے ایک انٹرویو میں بکتاش سیاوش نے طالبان پر سخت تنقید کرتے ہوئے کہا کہ ان کا اسلام سے کوئی تعلق نہیں اور وہ مذہب کو بدنام کر رہے ہیں۔انہوں نے الزام عائد کیا کہ طالبان کا مقصد اسلام کو خواتین کے حقوق، جدید تعلیم، فنون اور انسانیت کے خلاف ایک سخت گیر نظام کے طور پر دنیا کے سامنے پیش کرنا ہے۔سابق رکن پارلیمنٹ کا کہنا تھا کہ طالبان کی پالیسیوں نے عالمی سطح پر ان کی حقیقت واضح کر دی ہے، جبکہ افغان عوام اب مزید جبر کو قبول کرنے کے لیے تیار نہیں۔انہوں نے کہا کہ افغانستان میں جاری مزاحمتی سرگرمیاں اور مسلح گروہوں کی کارروائیاں اس بات کی علامت ہیں کہ افغان معاشرے کے ایک بڑے حصے نے طالبان حکومت کو مسترد کر دیا ہے۔
