ممبئی( سپورٹس ڈیسک) بھارت کے سابق کپتان سنیل گواسکر نے آئی پی ایل میں غیر فٹ غیر ملکی کھلاڑیوں کی شرکت پر پابندی لگانے کا مطالبہ کر دیا ہے۔انہوں نے یہ مؤقف کیمرون گرین کی حالیہ کارکردگی کے تناظر میں پیش کیا، جو کولکتہ کی ٹیم کی نمائندگی کرتے ہوئے ابتدائی میچز میں خاطر خواہ کارکردگی دکھانے میں ناکام رہے ہیں۔گرین نے تین میچز میں اٹھارہ، دو اور چار رنز بنائے جبکہ آل راؤنڈر ہونے کے باوجود اب تک بولنگ نہیں کی۔سنیل گواسکر کا کہنا تھا کہ ایسے کھلاڑی جو مکمل فٹ نہ ہوں یا شروع سے دستیاب نہ ہوں، انہیں ٹورنامنٹ میں کھیلنے کی اجازت نہیں ہونی چاہیے۔انہوں نے مزید کہا کہ اگر کوئی کھلاڑی اپنی مکمل صلاحیت کے ساتھ ٹیم کو فائدہ نہیں دے سکتا تو بہتر ہے کہ وہ دستبردار ہو جائے تاکہ ٹیم کسی متبادل کھلاڑی کو موقع دے سکے۔
