اسلام آباد( کامرس ڈیسک) وزیر خزانہ محمد اورنگزیب نے کہا ہے کہ موسمیاتی اہداف کے ثمرات عوام اور مقامی کمیونٹیز تک پہنچنے چاہئیں، جبکہ موسمیاتی منصوبوں پر مؤثر عملدرآمد کیلئے مضبوط پالیسی اور مالی وسائل تک رسائی ضروری ہے۔نیویارک میں موسمیاتی تبدیلی سے متعلق کانفرنس سے خطاب کرتے ہوئے محمد اورنگزیب نے کہا کہ ملکی سطح پر موسمیاتی منصوبوں کو عملی شکل دینے کی صلاحیت بڑھانا ہوگی اور اقدامات کو صرف بات چیت تک محدود رکھنے کے بجائے عملی پیش رفت کیلئے اتفاق رائے پیدا کرنا ضروری ہے۔انہوں نے کہا کہ پاکستان موسمیاتی منصوبوں کیلئے ملکی و عالمی وسائل متحرک کررہا ہے اور بین الاقوامی مالیاتی اداروں اور موسمیاتی فنڈز سے وسائل حاصل کرنے کی کوششیں جاری ہیں۔ اداروں کے درمیان رابطے کا فقدان اور سرمایہ کاری کے قابل منصوبوں کی کمی موسمیاتی منصوبوں میں بڑی رکاوٹیں ہیں۔وزیر خزانہ نے کہا کہ 2022 کے سیلاب کے بعد بعض عالمی مالی وسائل منصوبوں کی کمی کے باعث استعمال نہیں ہوسکے، اس لیے مستقبل میں ایسے منصوبے تیار کرنا ہوں گے جو دستیاب مالی وسائل کو مؤثر انداز میں عوامی فائدے میں تبدیل کرسکیں۔
