ایس آئی ایف سی اصلاحات کے ثمرات، پاکستان کے غیر ملکی زرِ مبادلہ ذخائر چار سال کی بلند ترین سطح پر پہنچ گئے

اسلام آباد( کامرس ڈیسک) ایس آئی ایف سی کی اصلاحات اور پالیسی تسلسل کے نتیجے میں پاکستان کے غیر ملکی زرِ مبادلہ ذخائر چار سال کی بلند ترین سطح تک پہنچ گئے ہیں۔مشیر وزیر خزانہ خرم شہزاد کے مطابق ملک کے مجموعی زرِ مبادلہ ذخائر 21.6 ارب ڈالر تک پہنچ گئے، جو گزشتہ چار سال میں ریکارڈ بلند سطح ہے۔ اس میں اسٹیٹ بینک آف پاکستان کے ذخائر 16.3 ارب ڈالر اور کمرشل بینکوں کے ذخائر 5.3 ارب ڈالر ہیں۔خرم شہزاد کے مطابق اسٹیٹ بینک کے ذخائر کا مجموعی حصہ 76 فیصد تک پہنچ گیا ہے، جو ملک کی مالی خودمختاری اور پالیسی کنٹرول میں اضافے کی واضح عکاسی کرتا ہے۔مشیر وزیر خزانہ نے مزید بتایا کہ یہ اضافہ بحران کے دوران فوری ردعمل کی صلاحیت اور مالی استحکام کو مضبوط کرتا ہے، جبکہ اسٹیٹ بینک کے بڑھتے ہوئے ریزروز ملک کے مضبوط مالیاتی ذخائر اور معاشی استحکام کا مظہر ہیں۔