بلاول بھٹو کی وزیراعظم کو پی ٹی آئی سے دوبارہ مذاکرات کی دعوت دینے کی تجویز

اسلام آباد(پاکستان خبر)چیئرمین پاکستان پیپلز پارٹی بلاول بھٹو زرداری نے وزیراعظم شہباز شریف کو مشورہ دیا ہے کہ وہ پاکستان تحریک انصاف کو ایک بار پھر مذاکرات کی دعوت دیں تاکہ تمام سیاسی قوتیں مل کر دہشت گردی کے خاتمے کے لیے مشترکہ کوششیں کر سکیں۔قومی اسمبلی کے اجلاس سے خطاب کرتے ہوئے بلاول بھٹو زرداری نے خیبر پختونخوا میں ایمرجنسی کے نفاذ کی حمایت کی اور کہا کہ صدر آصف علی زرداری نے آئین کے مطابق اس کی منظوری دی۔ ان کا کہنا تھا کہ پی ٹی آئی صدر مملکت اور پیپلز پارٹی کو تنقید کا نشانہ بنا رہی ہے، لیکن اسے یہ بھی بتانا چاہیے کہ خیبر پختونخوا میں ایمرجنسی نافذ نہ کرنے کی کیا ٹھوس وجہ تھی۔انہوں نے کہا کہ حکومت نے اپوزیشن کو مذاکرات میں شامل کرنے کی ہر ممکن کوشش کی۔ ایمرجنسی نافذ کرنا کوئی خوشی کی بات نہیں، اگر کوئی مضبوط جواز پیش کیا جاتا تو صدر اس پر دستخط نہ کرتے۔ ان کے مطابق جب پہلی مرتبہ یہ معاملہ صدر کے سامنے آیا تو ایمرجنسی کا فیصلہ کرنے سے پہلے اپوزیشن سے مذاکرات کا راستہ اختیار کیا گیا۔بلاول بھٹو نے بتایا کہ مذاکرات کی رات انہیں اطلاع دی گئی تھی کہ بات چیت کامیاب ہو گئی ہے۔ پیپلز پارٹی کے دو نمائندے بھی مذاکراتی کمیٹی کا حصہ تھے۔ تاہم ان کا کہنا تھا کہ موجودہ سیاسی اور قانونی حالات میں پی ٹی آئی کا کردار اہم ہے، جبکہ پارٹی کی صوبائی حکومت نے سیاسی خودکشی کی ہے، جسے اپوزیشن کو بھی تسلیم کرنا چاہیے۔پیپلز پارٹی کے چیئرمین نے کہا کہ حکومت نے مجبوری کے تحت ایمرجنسی نافذ کی ہے اور یہ اقدام مستقل نہیں ہے۔ دہشت گردی کے خلاف جنگ میں تمام سیاسی جماعتوں اور اداروں کو متحد ہونا ہوگا، کیونکہ کوئی ایک فرد یا ادارہ تنہا اس چیلنج کا مقابلہ نہیں کر سکتا۔بھارت سے متعلق گفتگو کرتے ہوئے بلاول بھٹو زرداری نے کہا کہ بھارت پاکستان کے ہاتھوں اپنے چھ طیارے گرائے جانے کو ہضم نہیں کر پا رہا اور وزیراعظم نریندر مودی مختلف مقامات پر آپریشن سندور جاری رہنے کی بات کر رہے ہیں۔ ان کے بقول بھارت علیحدگی پسند عناصر کے ذریعے پاکستان میں دہشت گردی کروا رہا ہے۔انہوں نے وفاقی حکومت پر زور دیا کہ موجودہ مسئلے کے حل کے لیے درمیانی راستہ نکالا جائے۔ بلاول بھٹو کا کہنا تھا کہ حکومت اپوزیشن کی جانب دوستی کا ہاتھ بڑھاتی ہے اور تمام سیاسی قوتوں کو چاہیے کہ وہ مذاکرات کی میز پر آ کر بات چیت کریں۔