اسلام آباد( پاکستان خبر)وزیر دفاع خواجہ آصف نے کہا ہے کہ پاکستان میں صرف بیوروکریسی ہی احتساب سے محفوظ اور ناقابل گرفت رہی ہے۔ایکس پر جاری اپنے بیان میں خواجہ آصف نے کہا کہ پاکستان میں حکمران اشرافیہ کے ہر طبقے کو اپنے اقدامات کی قیمت ادا کرنا پڑی۔ کرپشن، بدانتظامی اور دیگر الزامات کے تحت حکمران اشرافیہ کے خلاف کارروائیاں ہوتی رہیں، تاہم بیوروکریسی ہی احتساب سے محفوظ اور ناقابل گرفت رہی۔خواجہ آصف نے کہا کہ شاید ہی پاکستانیوں کو اس بات کا احساس ہو کہ ملک پر بیوروکریٹس بھی حکمرانی کرتے رہے ہیں۔ سابق گورنر جنرل غلام محمد بیوروکریٹ تھے، سابق وزیراعظم محمد علی بھی بیوروکریٹ تھے، جبکہ سابق صدور سکندر مرزا اور غلام اسحاق خان بھی بیوروکریٹس رہ چکے ہیں۔ ان کے مطابق یہ سب کچھ ایسے دور میں ہوا جب بظاہر اقتدار سیاستدانوں کے پاس تھا۔انہوں نے مزید کہا کہ بیوروکریٹس کو کوئی مورد الزام نہیں ٹھہراتا۔ سیاستدانوں کی نااہلی اور باہمی اختلافات نے بیوروکریسی کو سیاسی معاملات میں جگہ فراہم کی۔ سیاستدان اگر اپنی اصلاح کرلیں تو بیوروکریسی میں بھی خودبخود اصلاح اور احتساب کا عمل شروع ہوجائے گا۔
