لاہور( کامرس ڈیسک)وزیر اعلیٰ پنجاب مریم نواز نے رمضان المبارک میں رات 10 بجے دکانیں اور ریسٹورنٹس بند کرنے کے فیصلے کو واپس لے لیا اور اس کا نوٹیفکیشن جاری کر دیا۔حکومت پنجاب کی جانب سے جاری نوٹیفکیشن میں بتایا گیا ہے کہ وزیراعلیٰ نے تاجر برادری، چین اسٹورز، سپر اسٹورز اور ریسٹورنٹ ایسوسی ایشن کی درخواستیں منظور کرتے ہوئے دکانوں اور کاروباری مراکز کے اوقات کار سے استثنیٰ دے دیا ہے۔اب رات 10 بجے دکانیں بند کروانے کی پابندی ختم ہو گئی ہے اور صوبہ بھر کے کمشنرز، ڈپٹی کمشنرز اور متعلقہ محکموں کو اس سلسلے میں ہدایات جاری کر دی گئی ہیں۔وزیر اعلیٰ مریم نواز نے زوم میٹنگ کے دوران ہدایت کی کہ رمضان میں کاروبار کے اوقات پر کوئی پابندی نہ ہو، جس کے بعد پورے پنجاب میں رمضان کے دوران کاروباری سرگرمیاں 24 گھنٹے جاری رہیں گی۔نوٹیفکیشن میں واضح کیا گیا ہے کہ انتظامی امور سے وابستہ افسران رمضان المبارک میں دکانوں اور کاروباری مراکز کے اوقات کار کی پابندی نہیں کریں گے۔
