صارفین سے ٹیکس لے کر جیب میں ڈالنے والے کاروبار رعایت کے مستحق نہیں، وزیراعظم

اسلام آباد( پاکستان خبر) وزیراعظم شہباز شریف نے کہا ہے کہ صارفین سے ٹیکس وصول کرکے اپنی جیب میں ڈالنے والے کاروبار کسی قسم کی رعایت کے مستحق نہیں ہیں۔ حکومت ٹیکس کی مکمل استعداد حاصل کرنے کے لیے تمام ضروری اقدامات کرے گی۔وفاقی بورڈ آف ریونیو (ایف بی آر) کی اصلاحات سے متعلق جائزہ اجلاس کی صدارت کرتے ہوئے وزیراعظم نے کہا کہ ٹیکس نظام میں بہتری اور محصولات کے مکمل حصول کے لیے مؤثر اقدامات کیے جا رہے ہیں۔انہوں نے بتایا کہ بغیر براہِ راست انسانی مداخلت کے ٹیکس نگرانی کے نظام کے تحت کیمروں کی مدد سے پیداواری سرگرمیوں کی نگرانی مزید مؤثر بنائی جا رہی ہے۔دوسری جانب چھوٹے اور درمیانے درجے کے کاروباروں کی ترقی سے متعلق ادارے (سمیڈا) کے اجلاس میں وزیراعظم نے کاروباری افراد کے لیے قرضوں کی مجموعی مالیت 2028ء تک 1.1 ٹریلین روپے سے بڑھا کر 2.2 ٹریلین روپے کرنے کی ہدایت کی۔وزیراعظم شہباز شریف نے سمیڈا کو ہدایت کی کہ کاروباری افراد کو قرضوں کے حصول کے طریقہ کار سے آگاہ کرنے کے لیے ایک جامع لائحہ عمل تیار کیا جائے، تاکہ چھوٹے اور درمیانے درجے کے کاروباروں کو مالی سہولتوں تک رسائی حاصل ہوسکے۔