نیویارک(ویب ڈیسک) مصنوعی ذہانت کے پلیٹ فارم چیٹ جی پی ٹی استعمال کرنے والے صارفین کو مستقبل میں مزید اشتہارات نظر آنے کا امکان ہے، کیونکہ اوپن اے آئی نے چیٹ بوٹ میں اشتہارات کے دائرہ کار کو وسیع کرنے کا فیصلہ کیا ہے۔کمپنی نے رواں سال کے آغاز میں چیٹ جی پی ٹی کے اندر اشتہارات کی آزمائش شروع کی تھی، جسے ابتدائی طور پر محدود صارفین اور مخصوص علاقوں تک رکھا گیا تھا۔اوپن اے آئی کے مطابق مفت خدمات جاری رکھنے، بنیادی ڈھانچے اور مصنوعی ذہانت کی ٹیکنالوجی میں سرمایہ کاری کے اخراجات پورے کرنے کے لیے اشتہارات ضروری ہوسکتے ہیں۔فی الحال اشتہارات چیٹ جی پی ٹی کے جواب کے نیچے الگ سے دکھائے جاتے ہیں، تاہم کمپنی ایک نئے بصری انداز کی بھی آزمائش کر رہی ہے، جس میں چیٹ جی پی ٹی کی جانب سے تصویر تیار کیے جانے کے دوران اشتہار دکھایا جائے گا۔نئے اشتہاری طریقے کی ابتدائی آزمائش امریکا میں محدود تعداد میں مشتہر کمپنیوں کے ساتھ کی جائے گی۔ چیٹ جی پی ٹی کی فراہم کردہ معلومات کے مطابق مستقبل میں یہ اشتہارات مزید ممالک اور زیادہ مشتہرین تک پھیلائے جاسکتے ہیں۔کمپنی کے مطابق اشتہارات صرف تصاویر تیار کرنے تک محدود نہیں رہیں گے بلکہ مستقبل میں چیٹ جی پی ٹی کے دیگر حصوں میں بھی دکھائے جانے کا امکان ہے۔
