کوئٹہ (پاکستان خبر)چمن پھاٹک دھماکے کے زخمیوں کی عیادت کے لیے سرفراز بگٹی سول اسپتال کے ٹراما سینٹر پہنچے، جہاں انہوں نے زخمیوں اور ان کے اہل خانہ سے ملاقات کی۔وزیراعلیٰ نے زخمیوں کی خیریت دریافت کی اور ان کے علاج معالجے کی صورتحال کا جائزہ لیا۔ انہوں نے متاثرین کی جلد صحت یابی کے لیے نیک خواہشات اور دعا کا اظہار بھی کیا۔اس موقع پر انہوں نے محکمہ صحت کے حکام کو ہدایت کی کہ تمام زخمیوں کو بہترین طبی سہولیات فراہم کی جائیں اور ان کی مکمل صحت یابی تک ہر ممکن دیکھ بھال یقینی بنائی جائے۔سرفراز بگٹی نے کہا کہ ایسے واقعات عوام کے حوصلے کمزور نہیں کر سکتے۔ ان کے مطابق دہشت گردی کے خلاف جنگ صرف سیکیورٹی اداروں کی نہیں بلکہ پورے معاشرے اور ہر شہری کی مشترکہ ذمہ داری ہے۔انہوں نے مزید کہا کہ دہشت گردی کے خلاف جدوجہد میں عوام نے بڑی قربانیاں دی ہیں اور بلوچستان کے بے گناہ شہریوں کو نشانہ بنانا ایک بیرونی ایجنڈے کا حصہ ہے۔وزیراعلیٰ نے اس عزم کا اظہار کیا کہ قومی یکجہتی کے ذریعے دہشت گرد عناصر کو شکست دی جائے گی اور بلوچستان میں امن کے لیے دی جانے والی قربانیاں رائیگاں نہیں جائیں گی۔
