کراچی( سپورٹس ڈیسک) پشاور زلمی کے ہیڈ کوچ اوٹس گبسن نے بابر اعظم کی شاندار فارم پر اطمینان کا اظہار کرتے ہوئے کہا ہے کہ ان کی بیٹنگ دیکھ کر خوشی ہوتی ہے۔میچ کے بعد گفتگو کرتے ہوئے انہوں نے کہا کہ کرس گیل کے بعد سب سے زیادہ سنچریاں بنانے والوں میں بابر اعظم نمایاں مقام رکھتے ہیں، جو ان کی مستقل مزاجی کا ثبوت ہے۔اوٹس گبسن کا کہنا تھا کہ سفیان مقیم ایک باصلاحیت باؤلر ہیں اور ان کے نزدیک وہ عالمی معیار کے کھلاڑی بننے کی صلاحیت رکھتے ہیں، جبکہ نوجوان فاسٹ باؤلرز میں بھی بے پناہ ٹیلنٹ موجود ہے۔انہوں نے مزید کہا کہ نوجوان باؤلر محمد باسط میں سیکھنے کا جذبہ نمایاں ہے، جو مستقبل میں ان کی کامیابی کی بنیاد بن سکتا ہے۔واضح رہے کہ پاکستان سپر لیگ کے گیارھویں ایڈیشن کے تیئسویں میچ میں پشاور زلمی نے کوئٹہ گلیڈی ایٹرز کو شکست دے کر ایونٹ میں اپنی فتوحات کا سلسلہ برقرار رکھا ہے۔اس کامیابی کے بعد پشاور زلمی کی پلے آف مرحلے تک رسائی کے امکانات مزید روشن ہو گئے ہیں۔
