کاٹن ایئر 2025-26: پیداوار ہدف سے 45 فیصد کم
کراچی(کامرس ڈیسک) ملک میں کاٹن ایئر 2025-26 کے دوران کپاس کی مجموعی پیداوار 1.5 فیصد اضافے کے ساتھ 56 لاکھ 7 ہزار گانٹھ رہی، تاہم یہ مقررہ ہدف سے 45 لاکھ 93 ہزار بیلز (تقریباً 45 فیصد) کم ہے۔پی سی جی اے کی رپورٹ کے مطابق دلچسپ امر یہ ہے کہ سندھ اور بلوچستان میں کپاس کی پیداوار پنجاب کے مقابلے میں پیداواری ہدف تقریباً 17 فیصد کم ہونے کے باوجود وہاں پنجاب کے مقابلے میں تقریباً 7.6 فیصد زائد رہی۔چیئرمین کاٹن جنرز فورم احسان الحق نے بتایا کہ فیڈرل کمیٹی آن ایگریکلچر نے کاٹن ایئر 2025-26 کے لیے ملکی مجموعی پیداواری ہدف ایک کروڑ 2 لاکھ گانٹھ مقرر کیا تھا، جس میں پنجاب کے لیے 55 لاکھ 53 ہزار اور سندھ و بلوچستان کے لیے 46 لاکھ 27 ہزار گانٹھ شامل تھے۔پاکستان کاٹن جنرز ایسوسی ایشن کی حتمی رپورٹ کے مطابق اس سال مجموعی پیداوار 56 لاکھ 7 ہزار گانٹھ رہی، جو ہدف کے مقابلے میں 45 فیصد کم ہے۔ پنجاب میں پیداوار 26 لاکھ 93 ہزار بیلز رہی، جو ہدف کے مقابلے 51.5 فیصد کم ہے، جبکہ سندھ و بلوچستان میں 29 لاکھ 15 ہزار گانٹھ پیدا ہوئے، جو ہدف سے 37 فیصد کم ہیں۔رپورٹ میں بتایا گیا کہ رواں سال ٹیکسٹائل ملوں نے جننگ فیکٹریوں سے مجموعی طور پر 51 لاکھ 88 ہزار گانٹھ روئی خریدی، جبکہ برآمدکنندگان نے ایک لاکھ 78 ہزار گانٹھیں خریدیں۔