اسلام آباد( کامرس ڈیسک)پاکستان نے ڈیجیٹل معیشت کے فروغ اور ورچوئل اثاثہ جات کے تحفظ کیلئے باقاعدہ ریگولیٹری نظام متعارف کرا دیا۔ پاکستان ورچوئل اثاثہ جات ریگولیٹری اتھارٹی نے لائسنسنگ ضوابط جاری کرکے آن لائن پورٹل بھی فعال کردیا ہے۔ملک میں پہلے سے کام کرنے والے ورچوئل اثاثہ جات آپریٹرز 5 ستمبر تک لائسنس کیلئے درخواستیں جمع کراسکتے ہیں۔ نئے ضوابط کے تحت ایکسچینج، بروکر ڈیلر، مشاورتی خدمات، قرض دینے اور لینے، مائننگ سمیت 10 مختلف شعبوں کیلئے لائسنس کی کیٹیگریز مقرر کی گئی ہیں۔وزیر مملکت و چیئرمین پاکستان ورچوئل ایسٹ ریگولیٹری اتھارٹی بلال بن ثاقب کے مطابق نیا نظام لاکھوں پاکستانیوں کے ورچوئل اثاثوں کو تحفظ فراہم کرے گا، جبکہ لائسنس یافتہ اداروں کو بینکاری نظام سے منسلک ہونے کی سہولت ملے گی۔ ان کا کہنا تھا کہ قانونی فریم ورک سے غیر ملکی کمپنیوں کیلئے بھی سرمایہ کاری کے نئے مواقع پیدا ہوئے ہیں۔
