اسلام آباد( پاکستان خبر)اسلام آباد ہائیکورٹ نے پاکستان کے پانی کے حقوق کے تحفظ اور دریائے چناب کا پانی موڑنے کے بھارتی منصوبے سے متعلق درخواست 16 ستمبر کو سماعت کیلئے مقرر کردی۔چیف جسٹس اسلام آباد ہائیکورٹ سرفراز ڈوگر جوڈیشل ایکٹوزم پینل کی درخواست پر سماعت کریں گے، جس میں حکومت سے سندھ طاس معاہدے پر فوری عملدرآمد کیلئے عالمی قانونی فورمز سے رجوع کرنے کی استدعا کی گئی ہے۔درخواست میں مؤقف اختیار کیا گیا ہے کہ بھارت کا چناب کا پانی موڑنے کا منصوبہ پاکستان کی آبی سلامتی کیلئے سنگین خطرہ ہے، جبکہ حکومتی خاموشی بنیادی حقوق کی خلاف ورزی کے مترادف ہے۔ عدالت نے پہلے ہی وفاقی حکومت سے اس معاملے پر تفصیلی جواب طلب کر رکھا ہے۔
