ورلڈ تائیکوانڈو کپ: ایران مجموعی طور پر فاتح، پومزے میں پاکستان کی حکمرانی

لاہور ( سپورٹس ڈیسک)ورلڈ تائیکوانڈو پریذیڈنٹ کپ ایشیا ریجن 2026 کے مقابلے اختتام پذیر ہوگئے، جس میں ایران نے کیوروگی کیٹگری میں پہلی، کوریا نے دوسری اور قازقستان نے تیسری پوزیشن حاصل کی، جبکہ پومزے میں پاکستان نے میدان مار لیا۔جناح اسپورٹس کمپلیکس لاہور کینٹ میں ہونے والے سینئر کیوروگی کے 16 ویٹ کیٹگریز میں ایران نے 7 طلائی، ایک چاندی اور 8 کانسی کے تمغوں کے ساتھ پہلی پوزیشن حاصل کی۔ کوریا 5 طلائی، 4 چاندی اور 6 کانسی کے تمغوں کے ساتھ دوسرے جبکہ قازقستان 2 طلائی اور 3 کانسی کے تمغوں کے ساتھ تیسرے نمبر پر رہا۔پومزے کیٹگری میں پاکستان نے 3 طلائی، 3 چاندی اور 9 کانسی کے تمغوں کے ساتھ پہلی پوزیشن حاصل کی۔ کوریا دوسرے اور ایران تیسرے نمبر پر رہا۔کیوروگی میں ازبکستان چوتھے، تھائی لینڈ پانچویں، اردن چھٹے، سعودی عرب ساتویں، روس آٹھویں اور پاکستان نویں نمبر پر رہا۔ایونٹ کے آخری روز پیرا تائیکوانڈو کے مقابلے بھی منعقد ہوئے۔