واشنگٹن( سپورٹس ڈیسک)امریکی عدالت نے فٹبال میچوں کے دوران معزول شاہی دور کے ایرانی پرچم کے استعمال پر فیفا کی عائد پابندی کے حق میں فیصلہ دے دیا ہے۔فیصلے کے مطابق بین الاقوامی فٹبال مقابلوں کے دوران اسٹیڈیم میں صرف ایران کا سرکاری قومی پرچم ہی لہرانے کی اجازت ہوگی۔اس فیصلے کے بعد معزول شاہی دور کے حامیوں کو مایوسی کا سامنا کرنا پڑا ہے، جبکہ معاملہ ایک بار پھر سیاسی اور علامتی بحث کا مرکز بن گیا ہے۔واضح رہے کہ شاہی دور سے منسلک پرچم ایران کے موجودہ قومی پرچم سے مشابہ ہے، تاہم اس میں شیر اور سورج کا تاریخی نشان شامل ہوتا ہے جو 1979 کے انقلاب سے قبل شاہی نظام کی علامت سمجھا جاتا تھا۔یہ مقدمہ لاس اینجلس کاؤنٹی کی ایک عدالت میں دائر کیا گیا تھا، جس میں مؤقف اختیار کیا گیا کہ اس نوعیت کی پابندی آزادیٔ اظہار کے منافی ہے۔ تاہم جج کرٹس اے کین نے مختصر کارروائی کے بعد فیصلہ سناتے ہوئے فیفا کی پابندی کو برقرار رکھا۔
