اسلام آباد( کامر س ڈیسک) عالمی منڈی میں خام تیل کی قیمتوں میں نمایاں اضافہ ریکارڈ کیا گیا ہے، جہاں فی بیرل قیمت 2 ڈالر سے زائد بڑھ گئی۔غیر ملکی خبر رساں ادارے کے مطابق امریکی خام تیل کے ذخائر میں کمی کے باعث عالمی مارکیٹ میں تیل کی قیمتوں میں اضافہ دیکھنے میں آیا۔رپورٹس کے مطابق گزشتہ روز واشنگٹن اور تہران کے درمیان کشیدگی میں عارضی کمی کے باعث خام تیل کی قیمتوں میں کمی ہوئی تھی، تاہم نئے کاروباری سیشن میں قیمتیں دوبارہ بڑھ گئیں۔برینٹ خام تیل کے فیوچر معاہدوں کی قیمت میں 2.71 ڈالر یعنی 3.2 فیصد اضافہ ہوا، جس کے بعد یہ 86.80 ڈالر فی بیرل تک پہنچ گئی۔اسی طرح امریکی ویسٹ ٹیکساس انٹرمیڈیٹ خام تیل کی قیمت میں بھی 2.26 ڈالر یعنی 3.4 فیصد اضافہ ریکارڈ کیا گیا، جس کے بعد یہ 81.95 ڈالر فی بیرل پر ٹریڈ کرتی رہی۔
