بجلی کمپنیوں کی نجکاری کا فیصلہ، سرمایہ کاروں کیلئے بڑا موقع سامنے آ گیا

اسلام آباد ( کامرس ڈیسک) بجلی کی تقسیم کار کمپنیوں کی نجکاری کے حوالے سے اہم پیش رفت سامنے آئی ہے، جہاں نجکاری کمیشن بورڈ نے بڑا فیصلہ کر لیا۔اعلامیے کے مطابق فیصل آباد الیکٹرک سپلائی کمپنی، گوجرانوالہ الیکٹرک پاور کمپنی اور اسلام آباد الیکٹرک سپلائی کمپنی کی نجکاری کے لیے فریم ورک کی منظوری دے دی گئی ہے، جبکہ اس عمل کے لیے ٹرانزیکشن ڈھانچہ اور ابتدائی اہلیت کے معیار کو بھی حتمی شکل دے دی گئی ہے۔اعلامیے میں کہا گیا ہے کہ ڈسکوز کی نجکاری سے متعلق معاملہ مزید منظوری کے لیے کابینہ کمیٹی کو بھجوانے کا فیصلہ کیا گیا ہے، جبکہ نجکاری کے بعد اصلاحات کے ذریعے بجلی کے شعبے میں بہتری کی توقع ظاہر کی جا رہی ہے۔مزید بتایا گیا ہے کہ سرمایہ کاروں سے جلد اظہار دلچسپی طلب کیا جائے گا تاکہ نجکاری کا عمل آگے بڑھایا جا سکے۔دوسری جانب روز ویلٹ ہوٹل کی نجکاری کے لیے سٹی بینک کنسورشیم کو کامیاب قرار دیا گیا ہے، جبکہ اس منصوبے کے لیے مالیاتی مشیر کی تقرری کی بھی منظوری دے دی گئی ہے۔نجکاری کمیشن نے اس عزم کا اظہار کیا ہے کہ تمام عمل شفافیت اور تیز رفتاری کے ساتھ مکمل کیا جائے گا۔