پاسپورٹ کا نظام مکمل ای پاسپورٹ پر منتقل کرنے اور ہوم ڈلیوری شروع کرنے کا فیصلہ

اسلام آباد(پاکستان خبر) حکومت نے پاسپورٹ کے اجراء کے نظام کو مکمل طور پر ای پاسپورٹ پر منتقل کرنے اور شہریوں کے لیے ہوم ڈلیوری سروس شروع کرنے کا فیصلہ کر لیا ہے۔وفاقی وزیر داخلہ محسن نقوی کی زیر صدارت پاسپورٹ اینڈ امیگریشن ہیڈکوارٹرز میں اجلاس ہوا جس میں پاسپورٹ کے اجرا کو مکمل طور پر ای پاسپورٹ پر منتقل کرنے کا اصولی فیصلہ کیا گیا۔اجلاس میں بتایا گیا کہ اندرون و بیرون ملک پاسپورٹ کی ہوم ڈلیوری کے لیے ابتدائی انتظامات مکمل کیے جا چکے ہیں اور یہ سروس جلد شروع کر دی جائے گی، جس کے تحت شہریوں کو پاسپورٹ ان کی دہلیز پر فراہم کیا جائے گا۔اجلاس کے مطابق پریمیم سروسز کے لیے اضافی اخراجات کے مطابق فیس وصول کی جائے گی، جبکہ یکم جولائی سے پاسپورٹ دفاتر میں کیش لیس نظام نافذ کیا جائے گا۔مزید بتایا گیا کہ آن لائن پاسپورٹ درخواستوں کو پاک آئی ڈی پلیٹ فارم پر منتقل کیا جائے گا تاکہ عمل کو مزید تیز اور مؤثر بنایا جا سکے۔وزیر داخلہ نے کہا کہ ای پاسپورٹ سسٹم کے نفاذ سے جعلسازی اور فراڈ کے امکانات ختم ہوں گے، جبکہ بزنس پاسپورٹ سے متعلق پالیسی کو ایف بی آر کی مشاورت سے جلد حتمی شکل دی جائے گی۔