پاک فوج کسی ضلع یا صوبے کی نہیں، یہ قومی فوج ہے:وزیر دفاع خواجہ آصف

اسلام آباد( پاکستان خبر)قومی اسمبلی میں وزیر دفاع خواجہ آصف نے اپوزیشن لیڈر محمود خان اچکزئی کے پاک فوج سے متعلق بیان کو غیر ذمہ دارانہ قرار دیتے ہوئے سخت تنقید کی ہے۔ خواجہ آصف نے کہا کہ فوج کسی چار ضلعوں کی فوج نہیں، بلکہ یہ پورے ملک کی قومی فوج ہے۔وزیر دفاع نے کہا کہ پانچ سال میں 3,341 اہلکار شہید ہوئے، اور کشمیر، بلوچستان، گلگت بلتستان، خیبرپختونخوا، پنجاب اور سندھ کے افسران و جوانوں نے اپنی جانیں قربان کیں۔ انہوں نے کہا کہ فوج روزانہ دہشت گردی کے خلاف لڑائی میں نقصان اٹھا رہی ہے، اور بلوچستان میں 200 سے زائد دہشت گرد ہلاک کیے گئے۔خواجہ آصف نے کہا کہ فوج اپنے خون سے حلف کی تائید کر رہی ہے اور اسلام میں خون خرابے کی کوئی اجازت نہیں۔ انہوں نے واضح کیا کہ سیاستدان اپنی مفادات اور پارٹیوں کے لیے کام کرتے ہیں، لیکن فوج نے کبھی پارٹیاں نہیں بدلیں۔وزیر دفاع نے پاک فوج میں صوبائی تناسب بھی ایوان میں پیش کیا: پنجاب کا 51.1 فیصد، سندھ 20.52 فیصد، خیبرپختونخوا 16.28 فیصد، بلوچستان 6.04 فیصد، آزاد کشمیر اور گلگت بلتستان 2.4 فیصد اور اقلیتوں کی نمائندگی 3.52 فیصد ہے۔خواجہ آصف نے افغانستان کے بارے میں کہا کہ افغان شہریوں کی ہجرت ختم ہو چکی ہے اور وہاں کی اپنی حکومت ہے۔ انہوں نے کہا کہ پاکستان افغانستان کو سٹریٹیجک ڈیپتھ یا پانچواں صوبہ نہیں سمجھتا اور ہم وہاں امن کے ساتھ رہنا چاہتے ہیں۔انہوں نے اپوزیشن لیڈر کو ہدایت کی کہ نظریات رکھیں لیکن پاک فوج پر حملہ نہ کریں، اور فوج کی قربانیوں کا احترام کریں، کیونکہ یہ قوم کی جنگ ہے، کسی ایک ضلع یا صوبے کی نہیں۔