تعلیم کے بغیر ترقی ممکن نہیں، نوجوانوں کو کردار ادا کرنا ہوگا: احسن اقبال

فیصل آباد(پاکستان خبر)وفاقی وزیر منصوبہ بندی احسن اقبال نے کہا ہے کہ تعلیم کے بغیر کوئی ملک ترقی نہیں کرسکتا، نوجوانوں کو ملکی ترقی میں اپنا کردار ادا کرنا ہوگا اور تعلیم کے ساتھ تربیت پر بھی توجہ دینا ضروری ہے۔تقریب سے خطاب کرتے ہوئے احسن اقبال نے کہا کہ سیاسی عدم استحکام کے باعث ماضی میں کئی منصوبے پایۂ تکمیل تک نہیں پہنچ سکے، جبکہ ناخواندگی میں کمی کے لیے تعلیم کو ہر گھر تک پہنچانا ہوگا۔انہوں نے کہا کہ پاکستان میں شرح خواندگی 63 فیصد ہے جبکہ دنیا میں یہ شرح 90 فیصد سے زیادہ ہے۔ ملک کے تقریباً ڈھائی کروڑ بچے اسکولوں سے باہر ہیں، جس کی ایک وجہ والدین کی جانب سے تعلیم کی اہمیت کو مکمل طور پر نہ سمجھنا ہے۔وفاقی وزیر نے کہا کہ صحت کے معاملے میں بھی پاکستان میں غفلت پائی جاتی ہے، ملک میں آبادی میں اضافے کی شرح 2.55 فیصد تک پہنچ چکی ہے اور ایسی شرح کے ساتھ ترقی کرنا مشکل ہے۔احسن اقبال نے کہا کہ بیماریوں کے علاج کے بجائے سماجی رویوں میں بہتری کے ذریعے ان کی روک تھام پر توجہ دینا ہوگی۔ ہمیں فیصلہ کرنا ہے کہ بھوکے اور ان پڑھ بچوں کی نسل تیار کرنی ہے یا صحت مند اور تعلیم یافتہ نسل پروان چڑھانی ہے۔انہوں نے کہا کہ بچے کے پہلے پانچ سال انتہائی اہم ہوتے ہیں، کیونکہ اس عرصے میں اس کے دماغ کی تقریباً 90 فیصد نشوونما مکمل ہوجاتی ہے، اس لیے بچوں کو ابتدا ہی سے بہترین ماحول اور مناسب تربیت فراہم کرنا ضروری ہے۔