اسلام آباد( کامرس ڈیسک) اقتصادی رابطہ کمیٹی (ای سی سی) نے پاکستان ٹیلی ویژن کارپوریشن (پی ٹی وی) کے لیے مالی سال 2026-27 کے دوران 13 ارب روپے کی ٹیکنیکل سپلیمنٹری گرانٹ کی منظوری دے دی۔اجلاس میں سرکاری اداروں کی جانب سے بروقت بجٹ مختص نہ کرنے اور بعد ازاں اضافی فنڈز کے لیے وزارت خزانہ سے رجوع کرنے کے بڑھتے ہوئے رجحان پر تشویش کا اظہار کیا گیا۔ای سی سی نے وزارت اطلاعات و نشریات کو ہدایت کی کہ پی ٹی وی سمیت متعلقہ اداروں کو مالی طور پر خودمختار بنانے کے لیے جامع منصوبہ تیار کرکے ستمبر 2026 کے اختتام تک کمیٹی کے سامنے پیش کیا جائے۔اجلاس میں پی ٹی وی کے لیے لائسنس فیس کی مؤثر وصولی کا نظام وضع کرنے کی تجویز بھی دی گئی، تاکہ ادارے کے لیے مستقل آمدن کا ذریعہ پیدا ہو اور سرکاری و اضافی فنڈنگ پر انحصار کم کیا جاسکے۔ای سی سی میں اس بات کی بھی نشاندہی کی گئی کہ پی ٹی وی کی افرادی قوت بعض بڑے نجی نیوز چینلز کے مقابلے میں زیادہ ہے، تاہم ادارے کی آمدن اس تناسب سے نہیں ہے۔وزارت اطلاعات نے مؤقف اختیار کیا کہ پی ٹی وی کا نشریاتی دائرہ نجی چینلز کے مقابلے میں کہیں وسیع ہے اور ملک بھر میں خدمات فراہم کرنے کے باعث اس کے انسانی وسائل اور آپریشنل اخراجات بھی زیادہ ہیں۔اجلاس میں پی ٹی وی کی مالی حالت بہتر بنانے اور آمدن بڑھانے کے لیے معیاری ڈراموں اور پرفارمنگ آرٹس کے پروگراموں کی تیاری پر زیادہ توجہ دینے کی تجویز بھی پیش کی گئی۔
