اسلام آباد( کامرس ڈیسک) اسلام آباد میں ملک بھر کے لیے بجلی کی قیمت میں 82 پیسے فی یونٹ اضافے کی درخواست جمع کرا دی گئی ہے۔یہ درخواست مئی کی فیول پرائس ایڈجسٹمنٹ کے تحت سینٹرل پاور پرچیزنگ ایجنسی کی جانب سے نیشنل الیکٹرک پاور ریگولیٹری اتھارٹی میں جمع کرائی گئی ہے۔نیپرا کے مطابق اس درخواست پر سماعت 30 جون کو ہوگی، جس کے بعد حتمی فیصلہ کیا جائے گا۔سی پی پی اے کے اعداد و شمار کے مطابق مئی میں بجلی کی اوسط فیول لاگت 9 روپے 25 پیسے فی یونٹ رہی، جبکہ اندازہ 8 روپے 43 پیسے فی یونٹ لگایا گیا تھا۔ذرائع کے مطابق اگر یہ اضافہ منظور ہو جاتا ہے تو صارفین پر مجموعی طور پر تقریباً 12 ارب روپے کا اضافی مالی بوجھ پڑ سکتا ہے۔
