بجلی مہنگی ہونے کا امکان، سی پی پی اے نے فی یونٹ 82 پیسے اضافے کی درخواست دے دی

 اسلام آباد( کامرس ڈیسک) کراچی سمیت ملک بھر میں بجلی کی فی یونٹ قیمت میں اضافے کا امکان ظاہر کیا جا رہا ہے، جس کے لیے سنٹرل پاور پرچیزنگ ایجنسی (سی پی پی اے) نے نیپرا میں درخواست جمع کرا دی ہے۔سی پی پی اے کی جانب سے بجلی کی قیمت میں 82 پیسے فی یونٹ اضافے کی درخواست دی گئی ہے۔ مئی کے ماہانہ فیول ایڈجسٹمنٹ کی اس درخواست پر نیپرا کل سماعت کرے گی۔درخواست منظور ہونے کی صورت میں صارفین پر تقریباً 12 ارب روپے کا اضافی مالی بوجھ پڑ سکتا ہے۔اعداد و شمار کے مطابق مئی کے دوران 12 ارب 63 کروڑ 80 لاکھ یونٹس بجلی پیدا کی گئی، جبکہ بجلی کی اوسط فیول لاگت 9 روپے 25 پیسے فی یونٹ رہی۔ اسی عرصے میں فی یونٹ متوقع لاگت 8 روپے 43 پیسے مقرر کی گئی تھی۔مئی میں بجلی کی پیداوار کا 33.27 فیصد حصہ پانی سے حاصل کیا گیا، جبکہ مقامی کوئلے سے 11.66 فیصد، درآمدی کوئلے سے 13.54 فیصد، فرنس آئل سے 0.16 فیصد اور مقامی گیس سے 8.31 فیصد بجلی پیدا کی گئی۔نیپرا سی پی پی اے کی درخواست پر اعداد و شمار کا جائزہ لینے کے بعد حتمی فیصلہ جاری کرے گی۔