اسلام آباد( پاکستان خبر)اسلام آباد ہائی کورٹ نے انجنیئر محمد علی مرزا کو گستاخی کا مرتکب قرار دینے کے حوالے سے اسلامی نظریاتی کونسل کی رائے معطل کرنے کے حکم میں سماعت کو سات اپریل تک بڑھا دیا اور آئندہ سماعت پر اٹارنی جنرل سے معاونت طلب کر لی ہے۔اسلام آباد ہائی کورٹ کے جسٹس محسن اختر کیانی نے اس معاملے میں اسلامی نظریاتی کونسل کی رائے کے خلاف اسلم خاکی کی درخواست پر سماعت کی۔ عدالتی حکم کے باوجود دوران سماعت اٹارنی جنرل آف پاکستان پیش نہ ہو سکے۔ اسسٹنٹ اٹارنی جنرل عثمان گھمن نے عدالت کو بتایا کہ اٹارنی جنرل دیگر مصروفیات کے باعث پیش نہیں ہو سکتے، تاہم عدالت چاہے تو ایڈیشنل اٹارنی جنرل پیش ہو جائیں گے۔جسٹس محسن اختر کیانی نے واضح کیا کہ اٹارنی جنرل ہی پیش ہوں گے، اور گزشتہ سماعت پر بھی عدالت نے اٹارنی جنرل کی موجودگی کو لازمی قرار دیا تھا تاکہ وہ عدالتی معاونت فراہم کریں۔اسسٹنٹ اٹارنی جنرل نے عدالت سے درخواست کی کہ آئندہ سماعت کی تاریخ مقرر کی جائے، جس پر عدالت نے سماعت سات اپریل تک ملتوی کر دی۔درخواست گزار اسلم خاکی، اسلامی نظریاتی کونسل کے وکیل اور دیگر حکام عدالت میں پیش ہوئے۔ درخواست گزار نے انجنیئر محمد علی مرزا کو گستاخی کا مرتکب قرار دینے کی کونسل کی رائے کو چیلنج کر رکھا ہے۔
