یورپی یونین کا اسرائیل سے ای ون آبادکاری منصوبہ روکنے کا مطالبہ

لندن( مانیٹرنگ ڈیسک)یورپی یونین کی خارجہ پالیسی کی سربراہ کاجا کالس نے اسرائیل پر زور دیا ہے کہ وہ مقبوضہ مغربی کنارے میں ای ون آبادکاری منصوبہ فوری طور پر روک دے۔کاجا کالس نے کہا کہ ای ون علاقے میں نئی یہودی بستیوں کی تعمیر کا اسرائیلی منصوبہ دو ریاستی حل کے امکانات کو شدید متاثر کرسکتا ہے۔گزشتہ ہفتے اسرائیلی حکومت نے مقبوضہ مغربی کنارے میں ایک ہزار 200 سے زائد رہائشی یونٹس کی تعمیر کے لیے ٹینڈر جاری کیا تھا۔ یورپی یونین کے مطابق منصوبے سے مغربی کنارے کا شمالی حصہ جنوبی حصے سے منقطع ہوسکتا ہے۔کاجا کالس نے اسرائیل سے ٹینڈر واپس لینے اور مقبوضہ مغربی کنارے میں یہودی بستیوں کی توسیع کے دیگر منصوبے بھی روکنے کا مطالبہ کیا۔انہوں نے خبردار کیا کہ آبادکاری کی مزید توسیع فلسطینی علاقوں کے جغرافیائی تسلسل کو متاثر کرے گی اور مستقبل میں آزاد فلسطینی ریاست کے قیام کے امکانات محدود ہوسکتے ہیں۔ای ون مشرقی یروشلم اور مغربی کنارے کے درمیان واقع اہم علاقہ ہے، جہاں تعمیرات کو فلسطینی ریاست کے قیام اور دو ریاستی حل کے لیے بڑا چیلنج سمجھا جاتا ہے۔یورپی یونین اس سے قبل بھی مقبوضہ مغربی کنارے میں اسرائیلی آبادکاری کی توسیع پر تشویش کا اظہار کرتے ہوئے اسرائیل پر ایسے اقدامات سے گریز کرنے پر زور دیتی رہی ہے جو خطے میں دیرپا امن کے امکانات کو نقصان پہنچا سکتے ہیں۔