اسلام آباد ( کامرس ڈیسک)اسلام آباد میں حکومت نے چینی کی درآمد پر ڈیوٹی اور ٹیکس چھوٹ کی مدت میں توسیع کرتے ہوئے اسے 28 فروری 2026 تک بڑھا دیا ہے۔ فیڈرل بورڈ آف ریونیو نے اس سلسلے میں نوٹیفکیشن بھی جاری کر دیا ہے۔رپورٹس کے مطابق چینی کی درآمد پر سیلز ٹیکس 18 فیصد کی بجائے 0.25 فیصد مقرر کیا گیا ہے، جبکہ ودہولڈنگ ٹیکس بھی 0.25 فیصد تک کم کر دیا گیا ہے۔ اس ٹیکس چھوٹ کا اطلاق صرف ٹی سی پی کے ذریعے درآمد کی گئی چینی پر ہوگا۔حکومت نے بتایا کہ مجموعی ٹیکس شرح تقریباً 47 فیصد سے کم ہو کر تقریباً 5 فیصد رہ جائے گی۔ کابینہ کے فیصلے کے تحت سفید کرسٹل چینی کی درآمد پر کم شرح ٹیکس لاگو کی گئی ہے، اور ٹی سی پی کے ذریعے چینی کی درآمد 5 لاکھ میٹرک ٹن کی حد تک محدود ہوگی۔چینی کی درآمد کی اجازت ٹی سی پی یا نجی شعبے کے ذریعے کوٹہ سسٹم کے تحت مشروط ہے، جبکہ پہلے مقررہ ٹیکس چھوٹ کی تاریخ 30 ستمبر 2025 تھی، جسے اب توسیع دی گئی ہے۔
